Tri phwynt a rhyddhad i fechgyn Malky

14 Rhagfyr 2013

Caerdydd 1 West Bromwich Albion 0

Adroddiad Gwenda Richards

Ym myd pel droed heddiw mae’r ffin rhwng llwyddiant a methiant yn mynd yn un fwy fwy cul. Tase Caerdydd wedi colli yn erbyn West Brom ddydd Sadwrn fe allai Malky Mackay fod yn chwilio am swydd arall  yn y Flwyddyn Newydd. Ond yn y diwedd Caerdydd ennillodd a rheolwr West Brom, Steve Clarke, oedd ar y clwt nos Sadwrn.

DSC_0322

Ymosod cryf

Mae’n ddwl fel mae dyfodol clwb yn gallu dibynnu ar un penderfyniad y dyfarnwr, arbediad anhygoel, cic dros y bar  neu gôl wych, ond dyna wirionedd pel droed ar hyn o bryd. Er mawr rhyddhad i Malky a chefnogwyr yr Adar Gleision aeth popeth o blaid Caerdydd ddydd Sadwrn.

Chwarae bywiog

Gyda’r ddau dîm yn ysu am bwyntiau roedd hon yn gêm pwysig. Doedd Caerdydd ddim wedi sgorio ers dros 300 munud- roedd angen pwyntiau – a pherfformiad gwell na’r hyn yn erbyn Crystal Palace wythnos yn ôl.

Dechreuodd y tîm cartref gydag arddeliad- yn llawn hyder ac yn fywiog. Roedd penderfyniad Malky i roi Craig Noone yn y tîm o’r dechrau yn taro deuddeg. Mae Noone yn boblogaidd gyda’r ffans oherwydd ei fod o hyd yn barod i herio’r gwrthwynebwyr, yn rhedeg tuag atyn nhw’n gyflym ac uniongyrchol. Dyw e byth yn rhoi’r gorau iddi ac fe roedd ei ymdrechion i’w groesawi o’i gymharu a’r pasio lletdraws pwyllog sydd yn rhy gyfarwydd erbyn hyn.

Peter Whittingham : y gôl cyntaf gyda'i ben ers tair blynedd

Peter Whittingham : y gôl cyntaf gyda’i ben ers tair blynedd

Roedd yn rhaid i golwr Cymru Boaz Myhill fod ar ddihun yn gynnar iawn i arbed cic rydd Caerdydd. Tase’r bêl wedi croesi’r linell  fyddai neb yn siwr pwy sgoriodd gan fod Peter Whittingham a Peter Odemwingie yn ymddangos o fod wedi taro’r bel  ar yr un pryd.

Gôl prin

Doedd West Brom yn fawr o fygythiad yn yr hanner cyntaf ac reodd yn hawdd gweld pam eu bod yn straffaglu yn yr Uwchgynghrair. I ddweud y gwir doedd yr un dîm na’r llall yn edrych fel sgorio tan i’r gôl ddod ar ôl awr o chwarae cyffroes ond bler.

Frazier Campbell yn herio WBA

Fraizer Campbell yn herio WBA

A phan ddaeth hi roedd hi’n un i drysori. Mae goliau oddi ar ben Whittingham yn fwy prin na chardiau Nadolig rhwng gefnogwyr Caerdydd a’r Swans, ond fe neidiodd i ddodi croesiad Noone yn y rhwyd , fel Toshack neu Brian Clarke slawer dydd.

Kim Bo yn dangos ei ddawniau

Kim Bo yn dangos ei ddawniau

Fe ddihunodd WBA ac ar ddiwrnod gwahanol fe allen nhw fod wedi sgorio o leiaf un gôl. Unwaith eto fe wnaeth David Marshall arbediad gwych arall i ychwanegu at y nifer mae wedi gwneud y tymor hwn. Fe ddaliodd City ei gafael ar y gêm a sicrhau tri phwynt gwerthfawr iawn – a swydd Malky.

Rhannu'r erthygl hon

sylw ar yr adroddiad yma

Aled Evans yn dweud:

Adroddiad arbennig o dda oedd yn llwyddo i
gyfleu cyffro’r gem a’r rhyddhad o weld yr adar gleision
yn cipio tri phwynt hynod o werthfawr.