Traeth Bae Caerdydd Vueling yn dod â’r Haf i’r Ddinas

14 Gorffennaf 2015

Mae’r traeth yn ei ôl – a bydd Caerdydd eto’n creu ei glan môr ei hun yn Nhraeth Bae Caerdydd Vueling rhwng 25 Gorffennaf a 5 Medi.

Yn ôl y bobl tu ôl i’r atyniad, disgwylir i’r traeth trefol, sydd wedi bod yn andros o boblogaidd yn y Bae dros y blynyddoedd, ddenu chwarter miliwn o bobl i lan y dŵr, gyda llond bwced o atyniadau glan môr traddodiadol i ddiddanu teuluoedd dros wyliau’r haf.

Yn ogystal â’r traeth tywod mawr i blant, bydd yno ardal chwarae dŵr bas, amrywiaeth o reidiau a gemau gan gynnwys Zorb a Chwyrligwgan, Olwyn Fawr draddodiadol, adloniant byw am ddim, lluniaeth a hyd yn oed gadeiriau dec traddodiadol i ymwelwyr fola heulo.

Mae mynediad am ddim, ond codir tâl am rai cyfleusterau ar y safle.

Cyflwynir Traeth Bae Caerdydd Vueling unwaith eto gan gwmni Sayers Amusements. Yn ôl cyfarwyddwr y cwmni, Norman George Sayers, mae’r traeth wedi bod yn hynod boblogaidd ers ei sefydlu dau haf yn ôl.

“Rydyn ni wedi gwneud rhai newidiadau i’r fformat i wneud y traeth hyd yn oed yn well i gwsmeriaid” meddai, “a gall ymwelwyr edrych ‘mlaen at ddod â’u plant i amgylchedd diogel a hwyl.”

Bydd y traeth yn Roald Dahl Plass ar lannau dŵr Bae Caerdydd ac ar agor o 10am i 8pm o ddydd Sul i ddydd Iau ac o 10am i 10pm ar ddydd Gwener a dydd Sadwrn.

Mae rhagor o fanyion, ynghyd ag amserlenni’r adloniant, ar Facebook (Facebook.com/thebaybeachcdf) a Twitter (@thebaybeachcdf).

Mae manylion digwyddiadau eraill yng Nghaerdydd dros yr haf ar wefan Gŵyl Caerdydd.

Tagiau erthygl

Rhannu'r erthygl hon

sylw ar yr adroddiad yma