Dechrau addawol i dymor Caerdydd

17 Awst 2014

Caerdydd 3 Huddersfield 1

Gan P.D.W.B
Ar ôl un tymor siomedig gyda’r bechgyn mawr mae’r Adar Gleision yn ffeindio eu hunain nol yn y Bencampwriaeth eto. Ac er bydd y daith nol lan yn hir ac yn galed o leiaf mae tîm Ole Gunnar Solskjaer wedi cymryd y ddau gam gyntaf heb lawer o drafferth.

Yn dilyn gem gyfartal i ffwrdd yn erbyn Blackburn yn eu gem gynta roedd e’n bwysig iawn bod Caerdydd ddim yn gwneud cawlach o bethau yn eu gem gynta gartre. Gyda llawer o bobol yn dal i gwestiynnu doethineb apwyntio Ole yn lle Malky, a saith mil o’r ffans wedi diflannu dros nos (heb son am ffrae y crysau coch) roedd pwysau mawr ar y rheolwr a’r chwaraewyr i berfformio’n dda.

Roedd yr hanner awr cynta’n eitha difflach ond newidiodd popeth pan wnaeth yr hen stager Whittingham benderfynu saethu o 30 llath. Roedd pawb yn syfrdan, yn enwedig gôl-geidwad Huddersfield, pan ymddangosodd y bel yn sydyn yng nghefn y gôl. Math o gol roedd Whittingham yn arfer sgorio’n aml blynydde’n ôl a gobaith ffans Caerdydd yw bod e wedi ail-ffeindio ei mojo oherwydd ei bwysigrwydd i’r tîm pan mae’n chwarae’n dda.

Gôl gyntaf Kenwyne

Gôl gyntaf Kenwyne

Saith munud ar ol hynny sgoriodd Kenwyne Jones ar ôl gwaith da gan Daehli a dechreuodd pawb ymlacio. Camgymeriad mawr! Roedd meddwl amddiffynwyr Caerdydd ar y paned hanner amser pan sgoriodd Hudderfield o gic gornel heb unrhyw drafferth o gwbl gan newid yr awyrgylch yn y stadiwm.

Kennwyne yn tanio'r ail gôl

Kenwyne yn tanio’r ail gôl

Roedd e’n hawdd dychmygu pethau’n mynd o ddrwg i waeth yn yr ail hanner ond gyda gôl arall gan Kenwyne Jones yn y 56 munud dechreuodd Caerdydd reoli’r gem eto. Ac ar wahan i un cyfle i Huddersfield pan bwrodd Nakhi Wells y postyn o ongl cul, doedd dim rheswm i Ole a’r dorf boeni ragor.

Cafodd Adeyemi, chwaraewr newydd o Birmingham, gem gynta ardderchog ac roedd ei ddylanwad e yng nghanol y cae yn ffactor mawr ar berfformiad chwaraewyr eraill. Pan daeth chwaraewr newydd arall ar y cae, Guerra o Sbaen, roedd e hefyd yn edrych yn siarp. Ac os yw Kenwyne Jones ddim yn newydd mae e bendant yn edrych fel chwaraewr newydd! Y llynedd basai hyd yn oed ei fam yn ffeindio fe’n anodd i ddweud rhywbeth da amdano , ond y tymor ‘ma mae e wedi sgorio 3 gol mewn 2 gem.

Dechreuad da i’r tymor felly ond a fydd e’n parhau? Mae carfan enfawr gyda Caerdydd, yn llawn chwaraewyr talentog a phrofiadol. Gyda llawer o chwaraewyr sy wedi profi’n barod bod nhw’n gallu ennill y Bencampwriaeth……Whittingham, Hudson, Connolly, Gunnarsson, Marshall, Kim…….a nifer o chwaraewyr newydd gyda llawer o botensial, dylai Caerdydd gael tymor llwyddianus. Cawn ni weld! Chwaraewr y gêm: Tom Adeyemi

Rhannu'r erthygl hon

sylw ar yr adroddiad yma