Adolygiad CD: ‘Lullabies’ Catrin Finch

11 Awst 2013

Mae casgliad o ganeuon cwsg gan frenhines y delyn yn tawelu plant Heledd Owen

Mae werth rhoi cyfle i unrhywbeth neith falle swyno a thawelu babi yn fy marn ni. Yn yr achos hyn, CD newydd Catrin Finch ‘Lullabies’. Mae’n debyg bod gan Tywysog George Alexander Louis gopi yn barod gan i Catrin rhoi un i’r Tywysog Siarl yn ystod ymweliad i Llwyn-y-Wermod.

Mae na un ar hugain o ganeuon ar y cryno ddisg – oddeutu hanner gyda Catrin ar y delyn yna’r hanner arall gyda offerynwyr arall megis Bryn Terfel, Julian Lloyd Webber ar y cello ac yna llond llaw gyda rhai o blant y ddinas yn canu.

Ymateb fy merch i Martha sy’n naw mis i’r cryno ddisg oedd golwg o syndod i ddechrau yna gwen a gigl. O’n rhan i, y gosodiadau gyda’r corau plant yw uchafbwynt y CD – ‘The Dove’ gan Karl Jenkins gyda chor Ysgol Treganna yn canu a ‘Suo Gan’ gyda Bryn Terfel a chôr Ysgol Gwaelod y Garth i’ll dau yn sêr.

Os taw edrych am un gân dda i lawrlwytho i ddefnyddio mewn stafell wely plentyn yw’r nod, yna mae ‘Ar Lan y Môr’ yn hyfryd neu unrhyw un o’r rhai gyda Catrin yn chwarae yn unigol.  Yn bersonol doeddwn i ddim mor hoff o ‘Greensleeves’ ar y delyn, ond i fod yn deg falle bod hynny rhywbeth i neud gyda’r ffaith bod gan Martha degan sy’n chwarae Greensleeves ar ‘loop’…

Mae ‘Little Cloud’ a ‘My Child’ yn gwneud i’r casgliad deimlo’n fodern, gyda ‘Over the Rainbow’ a ‘Hush Little Baby’ tuag at ddiwedd y casgliad yn plesio’r mamau (neu tadau!) ‘soppy’ fel fi.

Cryno ddisg gwych i gael yn y car os i chi hanner ffordd lan yr A470 neu’r M4 a wedi gwrando ar Cwm Rhyd y Rhosyn ac yn barod am bach o lonydd – roedd Martha a’i brawd Llew yn cysgu erbyn y drydydd gân (tip i Kate os fydd hi angen hedio am Ynys Môn neu Balmoral).

Lullabies – Catrin Finch – Deutsche Grammophon 2013

am fyw o wybodaeth am Catrin Finch ewch i catrinfinch.com

 

Tagiau erthygl

Rhannu'r erthygl hon

sylw ar yr adroddiad yma